جموں وکشمیر قانون ساز اسمبلی نے ایڈوائزری کمیٹی کی رِپورٹ کو متفقہ طور پر منظور کرلی

جموں//جموں و کشمیر کی قانون ساز اسمبلی نے متفقہ طور پر بزنس ایڈوائزری کمیٹی (بی اے سی) کی سفارشات کو منظور کر لیا، جو ایوان کے کاروباری شیڈول سے متعلق ہیں۔رُکن اسمبلی مُبارک گُل نے اس حوالے سے تحریک پیش کی۔سپیکر جموں و کشمیر قانون ساز اسمبلی ایڈووکیٹ عبد الرحیم راتھرنے رِپورٹ کو صوتی ووٹ کے لئے پیش کیا جسے تمام اراکین نے متفقہ طور پر منظور کر لیا۔سفارشات کے مطابق ایوان کی کارروائیاں 17، 22 اور 24 ؍مارچ 2025 ء کو صبح 10 بجے شروع ہوں گی اور شام 5بجے اِختتام پذیر ہوں گی جبکہ دوپہر 1بجکر30منٹ سے 2بجکر 30منٹ تک ایک گھنٹے کا وقفہ ہوگا۔اِس کے علاوہ 11 ؍اپریل 2025 ء کو طے شدہ گورنمنٹ بزنس کو اَب 25 مارچ 2025 ء تک رِی شیدول کیا گیا ہے۔بی اے سی نے کارروائی کو مؤثر اور آسان بنانے کے لئے یہ بھی فیصلہ کیا ہے کہ اگر وزرأ گرانٹس کے مطالبات پر تحریری جوابات پڑھ کر سنائیں گے، تو وہ جوابات کو ایوان کے تمام ارکان میں بھی تقسیم کیا جائے گا۔سپیکر عبدالرحیم راتھر نے اسمبلی میں نظم و ضبط کی ضرورت پر زور دیتے ہوئے پارٹی رہنماؤں اور چیف وہپس سے کہا کہ وہ اراکین کو ایوان میں وقار اور نظم و ضبط برقرار رکھنے کی ہدایت کریں۔بی اے سی رپورٹ میں شامل نظر ثانی شدہ قانون ساز کیلنڈر کو بھی متفقہ طور پر منظور کیا گیا ہے۔