میں صرف کانفرنس کا ایک اچھا رکن بننے کیلئے پاکستان کا سفر کر رہے ہوں / ایس جئے شنکر
سرینگر // پاکستان میں شنگھائی تعاون کانفرنس کے دوران بھارت پاکستان تعلقات پر بات کرنے کیلئے وہاں نہیں جا رہے ہیں کی بات کرتے ہوئے وزیر خارجہ ایس جئے شنکر نے کہا کہ وہ صرف کانفرنس کا ایک اچھا رکن بننے کیلئے پاکستان کا سفر کر رہے ہیں۔سی این آئی کے مطابق وزیر خارجہ ایس جے شنکر نے کہا کہ وہ ہندوستان اور پاکستان تعلقات پر بات کرنے کیلئے اسلام آباد نہیں جا رہے ہیں لیکن ان کا یہ دورہ کثیرالجہتی پروگرام کے بارے میں ہے، جو کہ ایس سی او سربراہی اجلاس 2024 ہے۔ وزیر نے کہا کہ وہ صرف شنگھائی تعاون تنظیم کا ایک اچھا رکن بننے کے لیے پاکستان کا سفر کر رہے ہیں۔آئی سی سنٹر فار گورننس کے زیر اہتمام گورننس پر سردار پٹیل لیکچر دیتے ہوئے شنکر نے کہا ’’ ہاں، میں اس مہینے کے وسط میں پاکستان جانے والا ہوں اور یہ ایس سی او کے سربراہان حکومت کی میٹنگ کیلئے ہے‘‘۔ انہوں نے کہا ’’ میں توقع کرتا ہوں کہ میڈیا میں بہت زیادہ دلچسپی ہوگی کیونکہ تعلقات کی نوعیت ایسی ہے اور مجھے لگتا ہے کہ ہم اس سے نمٹ لیں گے۔ لیکن میں یہ کہنا چاہتا ہوں کہ یہ وہاں ایک کثیر جہتی تقریب کے لیے ہوگا، میرا مطلب ہے کہ میں وہاں ہندوستان اور پاکستان کے تعلقات پر بات کرنے نہیں جا رہا ہوں۔ میں وہاں ایس سی او کا ایک اچھا رکن بننے جا رہا ہوں۔ چونکہ میں ایک شائستہ اور سول شخص ہوں، اس لیے میں اپنے آپ کو اسی کے مطابق برتاؤ کروں گا۔ ‘‘ وزیر خارجہ نے اس بات پر روشنی ڈالی کہ شنگھائی تعاون تنظیم کا سربراہی اجلاس اس بار اسلام آباد میں ہو رہا ہے، کیونکہ بھارت کی طرح پاکستان بھی اس بلاک کا حالیہ رکن ہے۔سربراہی اجلاس میں جانے سے پہلے ان کی منصوبہ بندی کے بارے میں پوچھے جانے پر، انہوں نے کہا ’’یقیناً، میں اس کے لیے منصوبہ بندی کر رہا ہوں۔ میرے کاروبار میں، آپ ہر اس چیز کے لیے منصوبہ بناتے ہیں جو آپ کرنے جا رہے ہیں، اور بہت سی چیزوں کے لیے جو آپ نہیں کرنے والے ہیں، اور جو ہو سکتا ہے، آپ اس کے لیے بھی منصوبہ بندی کرتے ہیں‘‘۔
14
